א וְדָוִ֥יד זָקֵ֖ן וְשָׂבַ֣ע יָמִ֑ים וַיַּמְלֵ֛ךְ אֶת־שְׁלֹמֹ֥ה בְנ֖וֹ עַל־יִשְׂרָאֵֽל׃ ב וַיֶּֽאֱסֹף֙ אֶת־כָּל־שָׂרֵ֣י יִשְׂרָאֵ֔ל וְהַכֹּֽהֲנִ֖ים וְהַלְוִיִּֽם׃ ג וַיִּסָּֽפְרוּ֙ הַלְוִיִּ֔ם מִבֶּ֛ן שְׁלֹשִׁ֥ים שָׁנָ֖ה וָמָ֑עְלָה וַיְהִ֨י מִסְפָּרָ֤ם לְגֻלְגְּלֹתָם֙ לִגְבָרִ֔ים שְׁלֹשִׁ֥ים וּשְׁמוֹנָ֖ה אָֽלֶף׃ ד מֵאֵ֗לֶּה לְנַצֵּ֨חַ֙ עַל־מְלֶ֣אכֶת בֵּית־יְהוָ֔ה עֶשְׂרִ֥ים וְאַרְבָּעָ֖ה אָ֑לֶף וְשֹֽׁטְרִ֥ים וְשֹֽׁפְטִ֖ים שֵׁ֥שֶׁת אֲלָפִֽים׃ ה וְאַרְבַּ֥עַת אֲלָפִ֖ים שֹֽׁעֲרִ֑ים וְאַרְבַּ֤עַת אֲלָפִים֙ מְהַֽלְלִ֣ים לַֽיהוָ֔ה בַּכֵּלִ֕ים אֲשֶׁ֥ר עָשִׂ֖יתִי לְהַלֵּֽל׃ ו וַיֶּֽחָלְקֵ֥ם דָּוִ֖יד מַחְלְק֑וֹת לִבְנֵ֣י לֵוִ֔י לְגֵֽרְשׁ֖וֹן קְהָ֥ת וּמְרָרִֽי׃ ז לַגֵּֽרְשֻׁנִּ֖י לַעְדָּ֥ן וְשִׁמְעִֽי׃ ח בְּנֵ֣י לַעְדָּ֗ן הָרֹ֧אשׁ יְחִיאֵ֛ל וְזֵתָ֥ם וְיוֹאֵ֖ל שְׁלֹשָֽׁה׃ ט בְּנֵ֣י שִׁמְעִ֗י שְׁלֹמִ֧ית וַֽחֲזִיאֵ֛ל וְהָרָ֖ן שְׁלֹשָׁ֑ה אֵ֛לֶּה רָאשֵׁ֥י הָֽאָב֖וֹת לְלַעְדָּֽן׃ י וּבְנֵ֣י שִׁמְעִ֔י יַ֣חַת זִינָ֔א וִיע֖וּשׁ וּבְרִיעָ֑ה אֵ֥לֶּה בְנֵֽי־שִׁמְעִ֖י אַרְבָּעָֽה׃ יא וַיְהִי־יַ֣חַת הָרֹ֔אשׁ וְזִיזָ֖ה הַשֵּׁנִ֑י וִיע֤וּשׁ וּבְרִיעָה֙ לֹֽא־הִרְבּ֣וּ בָנִ֔ים וַיִּֽהְיוּ֙ לְבֵ֣ית אָ֔ב לִפְקֻדָּ֖ה אֶחָֽת׃ יב בְּנֵ֣י קְהָ֗ת עַמְרָ֥ם יִצְהָ֛ר חֶבְר֥וֹן וְעֻזִּיאֵ֖ל אַרְבָּעָֽה׃ יג בְּנֵ֥י עַמְרָ֖ם אַֽהֲרֹ֣ן וּמֹשֶׁ֑ה וַיִּבָּדֵ֣ל אַֽהֲרֹ֡ן לְֽהַקְדִּישׁוֹ֩ קֹ֨דֶשׁ קָֽדָשִׁ֤ים הֽוּא־וּבָנָיו֙ עַד־עוֹלָ֔ם לְהַקְטִיר֩ לִפְנֵ֨י יְהוָ֧ה לְשָֽׁרְת֛וֹ וּלְבָרֵ֥ךְ בִּשְׁמ֖וֹ עַד־עוֹלָֽם׃
֍ ֍ ֍
פרק כג
(א) וְדָוִיד זָקֵן וְשָׂבַע יָמִים, וַיַּמְלֵךְ אֶת שְׁלֹמֹה בְנוֹ עַל יִשְׂרָאֵל.
(ב) וַיֶּאֱסֹף דוד אֶת כָּל שָׂרֵי יִשְׂרָאֵל, וְהַכֹּהֲנִים וְהַלְוִיִּם, לסדר את משמרות הכהונה והלויה.
(ג) וַיִּסָּפְרוּ הַלְוִיִּם מִבֶּן שְׁלֹשִׁים שָׁנָה וָמָעְלָה, שזהו הזמן שמתחילים הלויים לעבוד בבית המקדש, וַיְהִי מִסְפָּרָם לְגֻלְגְּלֹתָם לִגְבָרִים שְׁלֹשִׁים וּשְׁמוֹנָה אָלֶף.
(ד) מֵאֵלֶּה נבחרו לְנַצֵּחַ עַל מְלֶאכֶת בֵּית יְהֹוָה עֶשְׂרִים וְאַרְבָּעָה אָלֶף, וְשֹׁטְרִים וְשֹׁפְטִים שֵׁשֶׁת אֲלָפִים.
(ה) וְאַרְבַּעַת אֲלָפִים שֹׁעֲרִים, וְאַרְבַּעַת אֲלָפִים מְהַלְלִים לַיהוָה, בַּכֵּלִים אֲשֶׁר עָשִׂיתִי לְהַלֵּל.
(ו) וַיֶּחָלְקֵם דָּוִיד מַחְלְקוֹת, לִבְנֵי לֵוִי, לְגֵרְשׁוֹן קְהָת וּמְרָרִי.
(ז) לַגֵּרְשֻׁנִּי, לַעְדָּן וְשִׁמְעִי.
(ח) בְּנֵי לַעְדָּן, הָרֹאשׁ יְחִיאֵל, וְזֵתָם וְיוֹאֵל, שְׁלֹשָׁה.
(ט) בְּנֵי שִׁמְעִי, שְׁלֹמִית וַחֲזִיאֵל וְהָרָן, שְׁלֹשָׁה אֵלֶּה רָאשֵׁי הָאָבוֹת לְלַעְדָּן.
(י) וּבְנֵי שִׁמְעִי, יַחַת זִינָא וִיעוּשׁ וּבְרִיעָה, אֵלֶּה בְנֵי שִׁמְעִי אַרְבָּעָה.
(יא) וַיְהִי יַחַת הָרֹאשׁ, וְזִיזָה הַשֵּׁנִי, וִיעוּשׁ וּבְרִיעָה לֹא הִרְבּוּ בָנִים, וַיִּהְיוּ לְבֵית אָב לִפְקֻדָּה אֶחָת.
(יב) בְּנֵי קְהָת, עַמְרָם יִצְהָר חֶבְרוֹן וְעֻזִּיאֵל, אַרְבָּעָה.
(יג) בְּנֵי עַמְרָם, אַהֲרֹן וּמֹשֶׁה, אך אין להחשיב מבני עמרם בין הלויים אלא את בניו של משה, והטעם לכך, וַיִּבָּדֵל אַהֲרֹן לְהַקְדִּישׁוֹ קֹדֶשׁ קָדָשִׁים, הוּא וּבָנָיו עַד עוֹלָם, לְהַקְטִיר לִפְנֵי יְהֹוָה, לְשָׁרְתוֹ, וּלְבָרֵךְ בִּשְׁמוֹ עַד עוֹלָם.
