כה וְעַל֙ אֹֽצְר֣וֹת הַמֶּ֔לֶךְ עַזְמָ֖וֶת בֶּן־עֲדִיאֵ֑ל וְעַ֣ל הָאֹֽצָר֡וֹת בַּשָּׂדֶ֞ה בֶּֽעָרִ֤ים וּבַכְּפָרִים֙ וּבַמִּגְדָּל֔וֹת יְהֽוֹנָתָ֖ן בֶּן־עֻזִּיָּֽהוּ׃ כו וְעַ֗ל עֹשֵׂי֙ מְלֶ֣אכֶת הַשָּׂדֶ֔ה לַֽעֲבֹדַ֖ת הָֽאֲדָמָ֑ה עֶזְרִ֖י בֶּן־כְּלֽוּב׃ כז וְעַ֨ל־הַכְּרָמִ֔ים שִׁמְעִ֖י הָרָֽמָתִ֑י וְעַ֤ל שֶׁבַּכְּרָמִים֙ לְאֹֽצְר֣וֹת הַיַּ֔יִן זַבְדִּ֖י הַשִּׁפְמִֽי׃ כח וְעַל־הַזֵּיתִ֤ים וְהַשִּׁקְמִים֙ אֲשֶׁ֣ר בַּשְּׁפֵלָ֔ה בַּ֥עַל חָנָ֖ן הַגְּדֵרִ֑י וְעַל־אֹֽצְר֥וֹת הַשֶּׁ֖מֶן יוֹעָֽשׁ׃ כט וְעַל־הַבָּקָר֙ הָֽרֹעִ֣ים בַּשָּׁר֔וֹן שִׁרְטַ֖י הַשָּֽׁרוֹנִ֑י וְעַל־הַבָּקָר֙ בָּֽעֲמָקִ֔ים שָׁפָ֖ט בֶּן־עַדְלָֽי׃ ל וְעַ֨ל־הַגְּמַלִּ֔ים אוֹבִ֖יל הַיִּשְׁמְעֵלִ֑י וְעַל־הָ֣אֲתֹנ֔וֹת יֶחְדְּיָ֖הוּ הַמֵּרֹֽנֹתִֽי׃ לא וְעַל־הַצֹּ֖אן יָזִ֣יז הַֽהַגְרִ֑י כָּל־אֵ֨לֶּה֙ שָׂרֵ֣י הָֽרְכ֔וּשׁ אֲשֶׁ֖ר לַמֶּ֥לֶךְ דָּוִֽיד׃ לב וִיהֽוֹנָתָ֤ן דּוֹד־דָּוִיד֙ יוֹעֵ֔ץ אִישׁ־מֵבִ֥ין וְסוֹפֵ֖ר ה֑וּא וִֽיחִיאֵ֥ל בֶּן־חַכְמוֹנִ֖י עִם־בְּנֵ֥י הַמֶּֽלֶךְ׃ לג וַֽאֲחִיתֹ֖פֶל יוֹעֵ֣ץ לַמֶּ֑לֶךְ וְחוּשַׁ֥י הָֽאַרְכִּ֖י רֵ֥עַ הַמֶּֽלֶךְ׃ לד וְאַֽחֲרֵ֣י אֲחִיתֹ֗פֶל יְהֽוֹיָדָ֤ע בֶּן־בְּנָיָ֨הוּ֙ וְאֶבְיָתָ֔ר וְשַׂר־צָבָ֥א לַמֶּ֖לֶךְ יוֹאָֽב׃
֍ ֍ ֍
(כה) וְעַל אֹצְרוֹת הכסף והזהב של הַמֶּלֶךְ היה ממונה עַזְמָוֶת בֶּן עֲדִיאֵל, וְעַל הָאֹצָרוֹת בַּשָּׂדֶה, שהם התבואה והפירות, בֶּעָרִים וּבַכְּפָרִים וּבַמִּגְדָּלוֹת, היה ממונה יְהוֹנָתָן בֶּן עֻזִּיָּהוּ.
(כו) וְעַל עֹשֵׂי מְלֶאכֶת הַשָּׂדֶה לַעֲבֹדַת הָאֲדָמָה, היה ממונה עֶזְרִי בֶּן כְּלוּב.
(כז) וְעַל מלאכת הַכְּרָמִים היה ממונה שִׁמְעִי הָרָמָתִי, וְעַל הפירות שֶׁבַּכְּרָמִים, לְאֹצְרוֹת הַיַּיִן, היה ממונה זַבְדִּי הַשִּׁפְמִי.
(כח) וְעַל הַזֵּיתִים, וְהַשִּׁקְמִים אֲשֶׁר בַּשְּׁפֵלָה, היה ממונה בַּעַל חָנָן הַגְּדֵרִי. וְעַל אֹצְרוֹת הַשֶּׁמֶן, יוֹעָשׁ.
(כט) וְעַל הַבָּקָר הָרֹעִים בַּשָּׁרוֹן היה ממונה שִׁרְטַי הַשָּׁרוֹנִי, וְעַל הַבָּקָר בָּעֲמָקִים שָׁפָט בֶּן עַדְלָי.
(ל) וְעַל הַגְּמַלִּים היה ממונה אוֹבִיל הַיִּשְׁמְעֵלִי, וְעַל הָאֲתֹנוֹת יֶחְדְּיָהוּ הַמֵּרֹנֹתִי.
(לא) וְעַל הַצֹּאן, יָזִיז הַהַגְרִי, ושלשה אלו היו גויים הבקיאים במלאכה זו, וכעין מה שנאמר (ישעיהו סא ה) 'וְעָמְדוּ זָרִים וְרָעוּ צֹאנְכֶם וּבְנֵי נֵכָר אִכָּרֵיכֶם וְכֹרְמֵיכֶם', כָּל אֵלֶּה שָׂרֵי הָרְכוּשׁ אֲשֶׁר לַמֶּלֶךְ דָּוִיד.
(לב) וִיהוֹנָתָן דּוֹד דָּוִיד, יוֹעֵץ, אִישׁ מֵבִין וְסוֹפֵר הוּא. וִיחִיאֵל בֶּן חַכְמוֹנִי היה עִם בְּנֵי הַמֶּלֶךְ, לגדלם ולחנכם.
(לג) וַאֲחִיתֹפֶל יוֹעֵץ לַמֶּלֶךְ, וְחוּשַׁי הָאַרְכִּי רֵעַ הַמֶּלֶךְ.
(לד) וְאַחֲרֵי שמת אֲחִיתֹפֶל, היו יועצי המלך יְהוֹיָדָע בֶּן בְּנָיָהוּ וְאֶבְיָתָר. וְשַׂר צָבָא לַמֶּלֶךְ, יוֹאָב בן צרויה.
