כג וַיִּזְבַּ֗ח לֵֽאלֹהֵ֣י דַרְמֶשֶׂק֮ הַמַּכִּ֣ים בּוֹ֒ וַיֹּ֗אמֶר כִּ֠י אֱלֹהֵ֤י מַלְכֵֽי־אֲרָם֙ הֵ֚ם מַעְזְרִ֣ים אֹתָ֔ם לָהֶ֥ם אֲזַבֵּ֖חַ וְיַעְזְר֑וּנִי וְהֵ֛ם הָֽיוּ־ל֥וֹ לְהַכְשִׁיל֖וֹ וּלְכָל־יִשְׂרָאֵֽל׃ כד וַיֶּֽאֱסֹ֨ף אָחָ֜ז אֶת־כְּלֵ֣י בֵית־הָֽאֱלֹהִ֗ים וַיְקַצֵּץ֙ אֶת־כְּלֵ֣י בֵית־הָֽאֱלֹהִ֔ים וַיִּסְגֹּ֖ר אֶת־דַּלְת֣וֹת בֵּית־יְהוָ֑ה וַיַּ֨עַשׂ ל֧וֹ מִזְבְּח֛וֹת בְּכָל־פִּנָּ֖ה בִּירֽוּשָׁלִָֽם׃ כה וּבְכָל־עִ֨יר וָעִ֤יר לִֽיהוּדָה֙ עָשָׂ֣ה בָמ֔וֹת לְקַטֵּ֖ר לֵֽאלֹהִ֣ים אֲחֵרִ֑ים וַיַּכְעֵ֕ס אֶת־יְהוָ֖ה אֱלֹהֵ֥י אֲבֹתָֽיו׃ כו וְיֶ֤תֶר דְּבָרָיו֙ וְכָל־דְּרָכָ֔יו הָרִֽאשֹׁנִ֖ים וְהָאַֽחֲרוֹנִ֑ים הִנָּ֣ם כְּתוּבִ֔ים עַל־סֵ֥פֶר מַלְכֵֽי־יְהוּדָ֖ה וְיִשְׂרָאֵֽל׃ כז וַיִּשְׁכַּ֨ב אָחָ֜ז עִם־אֲבֹתָ֗יו וַֽיִּקְבְּרֻ֤הוּ בָעִיר֙ בִּיר֣וּשָׁלִַ֔ם כִּ֚י לֹ֣א הֱבִיאֻ֔הוּ לְקִבְרֵ֖י מַלְכֵ֣י יִשְׂרָאֵ֑ל וַיִּמְלֹ֛ךְ יְחִזְקִיָּ֥הֽוּ בְנ֖וֹ תַּחְתָּֽיו׃
֍ ֍ ֍
(כג) וַיִּזְבַּח אחז קרבנות לֵאלֹהֵי דַרְמֶשֶׂק, הַמַּכִּים בּוֹ – לאחר שהיכו בו חיל ארם, וַיֹּאמֶר בדעתו, כִּי אֱלֹהֵי מַלְכֵי אֲרָם הֵם מַעְזְרִים אֹתָם, לכן לָהֶם אֲזַבֵּחַ, וְיַעְזְרוּנִי, וְהֵם הָיוּ לוֹ לְהַכְשִׁילוֹ, וּלְכָל יִשְׂרָאֵל.
(כד) וַיֶּאֱסֹף אָחָז אֶת כְּלֵי בֵית הָאֱלֹהִים לעצמו, וַיְקַצֵּץ אֶת כְּלֵי בֵית הָאֱלֹהִים, וַיִּסְגֹּר אֶת דַּלְתוֹת בֵּית ה' כדי לבטל לגמרי את עבודת המקדש, וַיַּעַשׂ לוֹ מִזְבְּחוֹת בְּכָל פִּנָּה בִּירוּשָׁלִָם.
(כה) וּבְכָל עִיר וָעִיר אשר לִיהוּדָה עָשָׂה בָמוֹת, לְקַטֵּר לֵאלֹהִים אֲחֵרִים, וַיַּכְעֵס אֶת ה' אֱלֹהֵי אֲבֹתָיו.
(כו) וְיֶתֶר דְּבָרָיו, וְכָל דְּרָכָיו הָרִאשֹׁנִים וְהָאַחֲרוֹנִים, הִנָּם כְּתוּבִים עַל סֵפֶר מַלְכֵי יְהוּדָה וְיִשְׂרָאֵל.
(כז) וַיִּשְׁכַּב אָחָז עִם אֲבֹתָיו, וַיִּקְבְּרֻהוּ בָעִיר בִּירוּשָׁלִַם, כִּי לֹא הֱבִיאֻהוּ לְקִבְרֵי מַלְכֵי יִשְׂרָאֵל [- למקום קבורת דוד ושלמה, שמלכו על כל ישראל], כי בעבור גודל רשעותו לא היה ראוי להקבר שם, וַיִּמְלֹךְ יְחִזְקִיָּהוּ בְנוֹ תַּחְתָּיו.
