כה וַיַּֽעֲמֵ֨ד אֶת־הַלְוִיִּ֜ם בֵּ֣ית יְהוָ֗ה בִּמְצִלְתַּ֨יִם֙ בִּנְבָלִ֣ים וּבְכִנֹּר֔וֹת בְּמִצְוַ֥ת דָּוִ֛יד וְגָ֥ד חֹזֵֽה־הַמֶּ֖לֶךְ וְנָתָ֣ן הַנָּבִ֑יא כִּ֧י בְיַד־יְהוָ֛ה הַמִּצְוָ֖ה בְּיַד־נְבִיאָֽיו׃ כו וַיַּֽעַמְד֤וּ הַלְוִיִּם֙ בִּכְלֵ֣י דָוִ֔יד וְהַכֹּֽהֲנִ֖ים בַּחֲצֹֽצְרֽוֹת׃ כז וַיֹּ֨אמֶר֙ חִזְקִיָּ֔הוּ לְהַֽעֲל֥וֹת הָֽעֹלָ֖ה לְהַמִּזְבֵּ֑חַ וּבְעֵ֞ת הֵחֵ֣ל הָֽעוֹלָ֗ה הֵחֵ֤ל שִׁיר־יְהוָה֙ וְהַחֲצֹ֣צְר֔וֹת וְעַ֨ל־יְדֵ֔י כְּלֵ֖י דָּוִ֥יד מֶֽלֶךְ־יִשְׂרָאֵֽל׃ כח וְכָל־הַקָּהָל֙ מִֽשְׁתַּחֲוִ֔ים וְהַשִּׁ֣יר מְשׁוֹרֵ֔ר וְהַחֲצֹֽצְר֖וֹת מַחְצְרִ֑ים הַכֹּ֕ל עַ֖ד לִכְל֥וֹת הָֽעֹלָֽה׃ כט וּכְכַלּ֖וֹת לְהַֽעֲל֑וֹת כָּֽרְע֗וּ הַמֶּ֛לֶךְ וְכָֽל־הַנִּמְצְאִ֥ים אִתּ֖וֹ וַיִּֽשְׁתַּחֲוֽוּ׃ ל וַ֠יֹּאמֶר יְחִזְקִיָּ֨הוּ הַמֶּ֤לֶךְ וְהַשָּׂרִים֙ לַלְוִיִּ֔ם לְהַלֵּל֙ לַֽיהוָ֔ה בְּדִבְרֵ֥י דָוִ֖יד וְאָסָ֣ף הַֽחֹזֶ֑ה וַֽיְהַלְלוּ֙ עַד־לְשִׂמְחָ֔ה וַֽיִּקְּד֖וּ וַיִּֽשְׁתַּחֲוֽוּ׃
֍ ֍ ֍
(כה) וַיַּעֲמֵד חזקיהו המלך אֶת הַלְוִיִּם בבֵּית ה', בִּמְצִלְתַּיִם, בִּנְבָלִים, וּבְכִנֹּרוֹת, בְּמִצְוַת – כפי שציוה דָּוִיד המלך וְגָד חֹזֵה הַמֶּלֶךְ וְנָתָן הַנָּבִיא, כִּי בְיַד ה' הַמִּצְוָה לשיר בבית המקדש, ואף שלא נכתבה מצוה זו בתורה, נמסרה היא בְּיַד נְבִיאָיו.
(כו) וַיַּעַמְדוּ הַלְוִיִּם בִּכְלֵי השיר של דָוִיד, וְהַכֹּהֲנִים בַּחֲצֹצְרוֹת, וכפי שעשו בחנוכת הבית, כיון שעבר זמן רב שביטלו את עבודת בית המקדש, והיו מעשיהם כעין חנוכת הבית מחדש.
(כז) וַיֹּאמֶר חִזְקִיָּהוּ לְהַעֲלוֹת הָעֹלָה לְהַמִּזְבֵּחַ, וּבְעֵת הֵחֵל העלאת הָעוֹלָה, הֵחֵל שִׁיר ה', וְהַחֲצֹצְרוֹת, וְעַל יְדֵי כְּלֵי דָּוִיד מֶלֶךְ יִשְׂרָאֵל היו השירים.
(כח) וְכָל הַקָּהָל מִשְׁתַּחֲוִים, וְהַשִּׁיר מְשׁוֹרֵר, וְהַחֲצֹצְרוֹת מַחְצְרִים, הַכֹּל עַד לִכְלוֹת העלאת הָעֹלָה.
(כט) וּכְכַלּוֹת לְהַעֲלוֹת, כָּרְעוּ הַמֶּלֶךְ וְכָל הַנִּמְצְאִים אִתּוֹ, וַיִּשְׁתַּחֲווּ.
(ל) וַיֹּאמֶר יְחִזְקִיָּהוּ הַמֶּלֶךְ וְהַשָּׂרִים לַלְוִיִּם, לְהַלֵּל לַה' בְּדִבְרֵי דָוִיד וְאָסָף הַחֹזֶה, וַיְהַלְלוּ עַד שמרוב הדבקות בה' הגיעו לְשִׂמְחָה, וַיִּקְּדוּ וַיִּשְׁתַּחֲווּ.
